Print this page

Аԥсуа драматә театр аҟны имҩаԥысит аспектакль «Акыр иаԥсоу Памела» аԥхьарбара

16 Рашәара 2021 157

Ииун 15 рзы Аԥсуа ҳәынҭқарратә драматә театр аҟны имҩаԥысит Джон Патрик илирикатә комедиа ала иқәыргылоу аспектакль «Акыр иаԥсоу Памела» аԥхьарбара. Арежиссиор-ақәыргылаҩ – Урыстәыла зҽаԥсазтәыз артист, Аԥсны зҽаԥсазтәыз акультура аусзуҩ, адрамтеатр арежиссиор Адгәыр Ақаҩба.

Аспектакль аҿы ихәмаруеит Аԥсуа театр актиорцәа рабиԥарақәа хԥа: Аԥсны жәлар рартист Виолетта Маан, Аԥсны зҽаԥсазтәыз артист Маиа Џьыкырԥҳа, Аԥсны зҽаԥсазтәыз артист Лаврик Ахба, Гарри Аџьынџьал, Адгәыр Малиа, Лана Џьапуаԥҳа, Гәдиса Ҭодуа. Аспектакль шьаҭас иамоуп америкатәи адраматург, асценарист Џьон Патрик ипиеса «Аҭакәажә дышԥақәаагари» («Как бы нам пришить старушку»). Ари аҩымҭаҿы рыӡбахә аҳәоит хҩык амцҳәаҩцәа рҭоурых, Памела Кронки захьӡу аҭакәажә данԥслак ашьҭахь илымоу амазаразы аԥгаԥса дара иртәыртәырц рҭахуп. Аха афырхаҵа хада лгәы рызԥжәаӡом ацәгьахәыццәа, лара урҭ зегь раналыжьуеит, агәра длыргоит аԥсҭазаараҿы аԥара раԥхьа ишыргылатәым.

Иахьа имҩаԥысуеит апремиера аԥхьарбара аҩбатәи амш.